Katika kile kinachoonekana ni azma ya Serikali kuhakikisha kuwa taarifa ya uchunguzi wa matukio ya uchaguzi inakuwa ya kina na shirikishi, Mamlaka ya Uteuzi imeongeza muda wa utendaji kazi wa Tume ya Kuchunguza Matukio ya Uvunjifu wa Amani kwa siku nyingine 42.
Uamuzi huo unaiwezesha Tume hiyo, inayoongozwa na Jaji Mkuu Mstaafu, Mohamed Othman Chande, kukamilisha kazi yake ifikapo au kabla ya Aprili 3, 2026. Awali, Tume hiyo iliyozinduliwa na Rais Dkt. Samia Suluhu Hassan mnamo Novemba 20, 2025, ilipaswa kuwasilisha ripoti yake Februari 20, mwaka huu.
Ongezeko hili la muda halikuja kwa bahati mbaya. Taarifa iliyochapishwa katika Gazeti la Serikali inaeleza kuwa Tume imekutana na mchanganyiko mkubwa wa taarifa ambazo zinahitaji uchambuzi wa kina. Aidha, Tume inatumia wataalamu wa ndani na nje ya nchi kufanya uchunguzi wa kisayansi na uchambuzi wa kidijiti ili kuthibitisha vielelezo mbalimbali vilivyokusanywa.
Hatua hii inadhihirisha kuwa Tume haiko tayari kufanya kazi kwa kukurupuka, bali imejikita katika weledi ili ripoti itakayotolewa iwe na ukweli usiopingika kwa ajili ya mustakabali wa amani ya nchi.
Moja ya sababu kuu za kuongezwa kwa muda huo ni kutoa fursa kwa wadau muhimu ambao bado hawajafika mbele ya Tume licha ya kualikwa mara kadhaa. Wadau hao ni pamoja na baadhi ya viongozi wa dini, viongozi wa vyama vya siasa, na taasisi zisizo za kiserikali.
Mamlaka imesisitiza kuwa ongezeko hili ni dirisha la kipekee ili kuhakikisha hakuna mtu, taasisi, au mdau yeyote—aliye ndani au nje ya nchi—atakayelalamika kuwa hakusikilizwa. Huu ni ushahidi wa dhamira ya dhati ya serikali katika kuimarisha mshikamano na maridhiano ya kitaifa.
Mwenyekiti wa Tume, Jaji Othman Chande, amewahimiza wananchi kutumia njia mbalimbali za kisasa na salama kuwasilisha maoni yao. Amesema kuwa mwananchi anaweza kutoa ushahidi wake kupitia:Mahojiano ya ana kwa ana;Maandishi kwa njia ya posta;Tovuti rasmi ya Tume (www.tume.uchunguzi.go.tz);Barua pepe, arafa (SMS), na mitandao ya kijamii.
Katika hatua inayolenga kujenga imani kwa wananchi, Tume imeweka wazi kuwa itaendelea kufanya vikao vya wazi. Hata hivyo, imetoa hakikisho la usalama kwa kusema kuwa mashahidi watakaohisi kuwa usalama wao uko hatarini watapewa ulinzi wa kipekee na kutoa ushahidi wao faragha.
Ongezeko hili la siku 42 ni hatua muhimu katika kuhakikisha kuwa mapengo yote ya habari yanazibwa na kwamba ripoti ya mwisho itakuwa dira ya kuzuia uvunjifu wa amani katika chaguzi zijazo, huku ikidumisha utulivu na mshikamano ambao ndio utambulisho wa Tanzania.
